Ի պաշտպանություն ազատ խոսքի - Մի մեծ իդեալիստ գրել է, որ մարդիկ ծնվում են հավասար իրավունքներով: Հետո հազարավորները ցինիզմով ու խորաթափանցությամբ քննադատել են ասվածը: Ոմանք էլ ոչ պակաս ջանասիրությամբ փորձել են իրականություն դարձնել այն: Պարադոքս է, սակայն, եւ վերջիններս` իրենց վճռական հավատով, եւ նրանք, ովքեր անխնա քննադատում էին, նպաստեցին, որ այս գաղափարը թեպետ դանդաղորեն, բայց ամրանա մարդկանց եւ ժողովուրդների գիտակցության մեջ: Որպես իրավաբան` մարդկանց հավասարությունն օրենքի առաջ ինձ համար միշտ եղել է կարեւորագույն սկզբունք, որովհետեւ գիտեմ, որ այն իրավագիտության հիմքն է: Որպես պրակտիկ մարդ` ես էլ գիտեմ, որ սա ամենադժվար իրականացվող նորմերից է: Որպես իրատես` չեմ կասկածում, որ այս առաքելությունն իրականացնելիս ավելի հաճախ դառնում են քննադատության թիրախ, քան արժանանում հիացմունքի: Բայց որպես լավատես` ես հավատում եմ, որ «կաթիլը քար է ծակում»: Եվ վերջապես որպես հումանիստ` ես լրիվ համաձայն եմ մեկ այլ իդեալիստի հետ, ով ասել է. «Ոչ ոք քեզ չի պարտադրում փոխել աշխարհն ու ավելի լավը դարձնել այն, բայց եւ ոչ ոք քեզ չի ազատել այդ գործին մասնակցելուց»: Իմ գործունեության մեջ ես առաջնորդվելու եմ հետևյալ սկզբունքով. դոմինանտը ոչ թե գործն է որպես արդյունք, այլ գործի հետեւում կանգնած կոնկրետ մարդը, որովհետեւ առանձին մարդկանց հաղթանակների գումարը հաճախ ավելին է, քան բոլորի միջև բաժանված մեկ հաղթանակը: Շնորհակալ եմ նրանց, ում իմ ընտրվելն անտարբեր չթողեց: Նրանց, ովքեր բացասաբար արձագանքելով դրան` ինձ առիթ տվեցին ևս մեկ անգամ վերլուծել անցյալի իմ արարքները եւ եզրակացություններ անել ապագայի համար: Շնորհակալ եմ նաեւ նրանց, ովքեր իրենց դրական վերաբերմունքով ամրացրին հավատս իմ նկատմամբ եւ ցանկությունը` լինել առավելագույնս արդյունավետ իմ այս պաշտոնում: Կարեն Անդրեասյան

2011-09-09

Ի պաշտպանություն ազատ խոսքի

Իրավասություն չունենալով միջամտելու քննության ընթացքում գտնվող դատական գործերին` այդուհանդերձ, Մարդու իրավունքների պաշտպան Կարեն Անդրեասյանն իր խորին մտահոգությունն է հայտնում խոսքի և մամուլի ազատության իրացման ցանկացած վտանգի և այդ ոլորտում օրենսդրության ոչ պատշաճ կիրառման յուրաքանչյուր դեպքի առնչությամբ: Մասնավորապես` կոչ է արվում բոլոր պետական մարմիններին զերծ մնալ այնպիսի գործողություններից, որոնք արգելակում են արտահայտվելու ազատությունն ու տեղեկատվության ազատ հոսքը մեր հասարակությունում` փաստացիորեն հանգեցնելով գրաքննության մշակույթի ձևավորմանը: Մարդու իրավունքների եվրոպական դատարանը հստակ դիրքորոշում և նախադեպային սկզբունք է սահմանել հրապարակման նախնական արգելքների վերաբերյալ, այն է` հատկապես մամուլի պարագայում, նույնիսկ շատ կարճ ժամանակահատվածով հրապարակումն ուշացնելը կարող է արժեզրկել տեղեկատվությունը և այն դարձնել անհետաքրքիր /«Օբզերվերը և Գարդիաննե ընդեմ Միացյալ Թագավորության գործով/:

<<< Ետ

Հայտարարություններ