Հայաստանի Հանրապետությունում մարդու իրավունքների պաշտպանության ոլորտում Մարդու իրավունքների պաշտպանի կողմից իրականացվող մշտադիտարկումները, քաղաքացիների դիմումների և բողոքների ուսումնասիրությունը, ինչպես նաև ոլորտային հետազոտությունները վկայում են, որ գործարար գործունեության հետ առնչվող մարդու իրավունքների պաշտպանության խնդիրները բազմաշերտ են և ընդգրկում են հասարակական կյանքի տարբեր ոլորտներ։

Արձանագրված մարտահրավերներին արձագանքելու և ազգային մակարդակում գործնական ուղենիշներ ձևավորելու նպատակով Մարդու իրավունքների պաշտպանի աշխատակազմի Գործարարարության ոլորտում իրավունքների պաշտպանության բաժինը մշակել է «Գործարարություն և մարդու իրավունքներ» ուղեցույցը, որում ներկայացված են «Գործարարություն և մարդու իրավունքներ» միջազգային հայեցակարգը, ՄԱԿ-ի Ուղենշային սկզբունքները, պատասխանատու գործարար վարքագծի չափանիշները։

Այն անդրադառնում է պետության՝ մարդու իրավունքները պաշտպանելու պարտավորությանը, բիզնեսի՝ մարդու իրավունքները հարգելու կորպորատիվ պատասխանատվությանը, մարդու իրավունքների պատշաճ ուսումնասիրության մեխանիզմներին և արդյունավետ իրավական պաշտպանության միջոցների հասանելիությանը։

Ուղեցույցը նախատեսված է պետական մարմինների, գործարար համայնքի և քաղաքացիական հասարակության կազմակերպությունների համար՝ նպատակ ունենալով նպաստել մարդու իրավունքների վրա հիմնված մոտեցումների ներդրմանը, պատասխանատու գործարար վարքագծի խթանմանը և մարդու իրավունքների նկատմամբ հարգանքի մշակույթի ամրապնդմանը։

Մարդու իրավունքների պաշտպանն ընդգծում է, որ գործարար միջավայրում մարդու իրավունքների նկատմամբ հարգանքի ապահովումն ու հետևանքային արձագանքումից դեպի կանխարգելիչ կորպորատիվ պատասխանատվության անցումը պետք է դառնան բոլոր շահագրգիռ կողմերի ընդհանուր հանձնառությունը։ 

Այդ նպատակին հասնելու համար կարևոր է, որպեսզի պետական մարմինները, գործարար համայնքը և քաղաքացիական հասարակության կազմակերպությունները համատեղեն ջանքերը՝ պատասխանատու գործարար վարքագծի խթանման, ռիսկերի նվազեցման և իրավական պաշտպանության արդյունավետ միջոցների հասանելիության ապահովման ուղղությամբ։

Միայն պետության, բիզնեսի և քաղաքացիական հասարակության համատեղ ջանքերով հնարավոր կլինի ձևավորել մարդու իրավունքների նկատմամբ պատասխանատու, կայուն և վստահելի գործարար միջավայր։