Մարդու իրավունքների պաշտպանը՝ որպես Կանխարգելման ազգային մեխանիզմ, իր գործունեության շրջանակներում հոկտեմբերի 15-ին և 16-ին Ծաղկաձորում կազմակերպել էր «Խոշտանգումների և անմարդկային վերաբերմունքի կանխարգելումը» խորագրով երկօրյա վերապատրաստման դասընթաց՝ պետական մարմինների ներկայացուցիչների համար։

Դասընթացին մասնակցել են ՀՀ արդարադատության նախարարության, Քրեակատարողական ծառայության և քրեակատարողական հիմնարկների, ՀՀ առողջապահության նախարարության և «Քրեակատարողական բժշկության կենտրոն» ՊՈԱԿ-ի, վերջինիս ստորաբաժանումների, հոգեբուժական կազմակերպությունների, ՀՀ ներքին գործերի նախարարության և համայնքային ոստիկանության գլխավոր վարչության ոստիկանության բաժինների ձերբակալվածներին պահելու վայրերի, ՀՀ աշխատանքի և բարեկեցության նախարարության շուրջօրյա մասնագիտացված խնամքի հաստատությունների, ՀՀ դատախազության, Քննչական կոմիտեի ներկայացուցիչները։

Բացման խոսքով հանդես է եկել Մարդու իրավունքների պաշտպանի աշխատակազմի կանխարգելման ազգային մեխանիզմի իրականացման համակարգող, Խոշտանգումների և վատ վերաբերմունքի կանխարգելման վարչության պետ Լաուրա Գասպարյանը։

Միջոցառման նպատակն էր ներկայացնել Կանխարգելման ազգային մեխանիզմի մանդատն ու գործառույթները, խոշտանգման իրավական սահմանումը և հասկացությունը ներպետական իրավական համակարգում ու միջազգային փաստաթղթերում, խոշտանգումների կանխարգելման ոլորտի միջազգային փաստաթղթերը և ԽԿԿ չափանիշները, նպաստել ոլորտային աշխատողների մասնագիտական կարողությունների ամրապնդմանը և փոխգործակցության խթանմանը՝ ի նպաստ խոշտանգումների և վատ վերաբերմունքի կանխարգելման արդյունավետ համակարգի ձևավորման։

Լ. Գասպարյանը բացման խոսքում կարևորել է այս ձևաչափով շարունակական վերապատրաստումների իրականացումը և վերահաստատել, որ ոլորտում առկա խնդիրները հնարավոր չէ լուծել միայն դրանք արձանագրելով կամ ուղղակի բարձրաձայնելով, այլ անհրաժեշտ է համատեղ, համակարգված ջանքերով դրանք ճանաչելի դարձնել և համագործակցային հարթակում լուծումներ գտնել։

Դասընթացը վարել են Լաուրա Գասպարյանը և ՄԻՊ աշխատակազմի Խոշտանգումների և վատ վերաբերմունքի կանխարգելման վարչության պետի տեղակալ Հովհաննես Ղուկասյանը։

Միջոցառումը կազմակերպվել է Միավորված ազգերի կազմակերպության «Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ» 1984 թվականի կոնվենցիայի՝ 2002 թվականի դեկտեմբերի 18-ին ընդունված կամընտիր արձանագրության հիման վրա ստեղծված Հատուկ հիմնադրամի դրամաշնորհի շրջանակներում։