Մարդու իրավունքների պաշտպանի նախաձեռնած` «Օրն իրավունքների պաշտպանության առաջնագծում» նախագիծը շարունակում է միավորել երիտասարդների, ովքեր պատրաստ են բարձրաձայնել մեր հասարակական միջավայրում առկա խնդիրները և մասնակցել փոփոխությունների իրականացման գործընթացներին։

Այս անգամ նախագծին միացել է Շիրակի մարզից Մանե Շաբոյանը՝ միջազգային հարաբերությունների ոլորտում կրթություն ստացող ուսանող, ով հետաքրքրված է մարդու իրավունքների պաշտպանությամբ և ակտիվորեն ներգրավված է տարբեր հասարակական նախաձեռնություններում։

Մանեն մեկ օր կանցկացնի Մարդու իրավունքների պաշտպանի աշխատակազմում՝ ներսից ծանոթանալով իրավունքների պաշտպանության ոլորտի աշխատանքին, առկա մարտահրավերներին և դրանց հաղթահարման ուղղությամբ իրականացվող քայլերին։

Եթե երիտասարդ ես, վստահ ես, որ ուզում ես պատասխանատվություն ստանձնել հասարակությունում առկա մարտահրավերները բարձրաձայնելու և հաղթահարելու գործում, ապա նախագծի հաջորդ մասնակիցը կարող ես լինել հենց դու։

Մասնակիցները հնարավորություն ունեն անմիջականորեն ծանոթանալու Մարդու իրավունքների պաշտպանի գործունեությանը, ներգրավվելու աշխատանքային գործընթացներում, բարձրաձայնելու իրավունքներին առնչվող` մեր միջավայրում առկա խնդիրները և առաջարկելու դրանց համար լուծումներ։ Սա նաև հարթակ է՝ զարգացնելու իրավական գիտելիքները, ձեռք բերելու նոր փորձառություն և դառնալու ավելի ակտիվ ու իրազեկ քաղաքացի։

Ուղարկիր ինքնակենսագրական և մոտիվացիոն նամակ ու պատմիր քո մասին՝ նշելով, թե ինչո՞ւ հենց դու պետք է լինես նախագծի հաջորդ մասնակիցը։

Քո պատմությունն ուղարկիր՝ youthvoice@ombuds.am հասցեին: