Հետաքրքրվա՞ծ ես մարդու իրավունքներով, իրավագիտության ֆակուլտետի ուսանո՞ղ ես, ցանկանո՞ւմ ես ձեռք բերել նոր գիտելիքներ և հմտություններ։

Միացի՛ր Մարդու իրավունքների պաշտպանի կողմից կազմակերպվող «Մարդու իրավունքների աշնանային դպրոցին», զարգացրո՛ւ մասնագիտական կարողություններդ և խորացրո՛ւ գիտելիքներդ մարդու իրավունքների ոլորտում։

Մարդու իրավունքների աշնանային դպրոցին մասնակցությունը հնարավորություն կտա՝

•  ուսումնասիրել մարդու իրավունքների հիմնարար սկզբունքները,

• ծանոթանալ ՀՀ մարդու իրավունքների պաշտպանի լիազորություններին և հիմնական գործառույթներին,

• ծանոթանալ մարդու իրավունքների ազգային և օմբուդսմանական հաստատությունների գործունեության հիմնական սկզբունքներին և դրանց առջև ծառացած մարտահրավերներին,

• խորքային գիտելիքներ ձեռք բերել մարդու իրավունքների պաշտպանության մի շարք արդիական և մարտահրավերային ոլորտներում, այդ թվում՝ իրավահավասարության և խտրականության բացառման, կարծիքի արտահայտման ազատության և ատելության խոսքի դեմ պայքարի, մաքուր, առողջ և կայուն շրջակա միջավայրում ապրելու իրավունքի, անձնական տվյալների պաշտպանության, ինչպես նաև մարդու իրավունքների վրա գործարարության և արհեստական բանականության ազդեցության վերաբերյալ,

• մասնակցել ոլորտի լավագույն մասնագետների կողմից անցկացվող քննարկումներին, այցելել ՀՀ մարդու իրավունքների պաշտպանի աշխատակազմ և այլ պետական կառույցներ։

Մարդու իրավունքների աշնանային դպրոցը հաջողությամբ ավարտած մասնակիցներին կհանձնվեն հավաստագրեր։

Ովքե՞ր կարող են դիմել

• ՀՀ բուհերի իրավագիտության ֆակուլտետների՝ բակալավրի որակավորում շնորհող կրթական ծրագրերի 2-4-րդ կուրսերի ուսանողները և մագիստրոսի որակավորում շնորհող կրթական ծրագրերի ուսանողները, ովքեր հետաքրքրված են մարդու իրավունքների ոլորտով։

Ինչպե՞ս դիմել

• Մինչև 2026 թվականի սեպտեմբերի 25-ը zhanna.hakobyan@ombuds.am և luiza.loqyan@ombuds.am էլեկտրոնային փոստի հասցեներին անհրաժեշտ է ներկայացնել դիմում, մոտիվացիոն նամակ և ինքնակենսագրություն։

Ընտրությունն իրականացվելու է գրավոր և բանավոր փուլերի արդյունքների հիման վրա։

Դպրոցին մասնակցելու հնարավորություն կստանա 20 ուսանող:

Մարդու իրավունքների աշնանային դպրոցի շրջանակում կազմակերպվող միջոցառումները կմեկնարկեն 2026 թվականի հոկտեմբերին։

Տևողություն՝ 4 շաբաթ՝ շաբաթական երկու օր հաճախականությամբ։

Մրցույթի գրավոր և բանավոր փուլերը հաջողությամբ հաղթահարած ուսանողներին կտրամադրվի տեղեկատվություն Մարդու իրավունքների աշնանային դպրոցի մանրամասների վերաբերյալ։